you can login to your account or register with kal

ژ بزاڤێن شاندێ ئیکه‌تییا نڤیسه‌رێن کورد

په‌یڤا ئێکه‌تییا نڤیسه‌رێن کورد – دهۆک د کۆنفرانسا زمانێ کوردی ده‌ ل به‌رلینێ

ب ناڤێ ئێكه‌تیا نڤیسه‌رێن كورد - تایێ دھۆكێ، ئه‌م سوپاسیا كۆمیسیۆنا زمان و په‌روه‌رده‌یا ( ك ن ك) و ئنستیتوتا كوردی ل ئه‌لمانیا دكن ژ بۆ گرێدانا ڤی كۆنفرانفسێ زمانی و ڤه‌خوا‌ندنا كۆمه‌كا ئه‌ندامێن مه‌ و مامۆسته‌یێن زانكۆیا دھۆكێ، داكو ب ره‌نگه‌كی ھێمن و ره‌حه‌ت و زانستی دان و ستاندنێ ل سه‌ر چه‌ند مژارێن زمانێ كوردی بکن و ھه‌ول بدن دیتن و بۆچوونێن شه‌ھره‌زایێن زمانێ كوردی ژ نێزیك بزانین و سووده‌كێ ژێ وه‌ربگرین ژ بۆ پێشڤه‌برنا زمانێ كوردی.
زمان ستوونا سه‌ره‌كی یا پێشڤه‌برنا ئه‌ده‌ب و په‌یڤا كوردی یه‌، ژبلی كو ناسنامه‌یا مه‌ یا نه‌ته‌وی یه‌ و زمانێ كوردی ده‌وله‌مه‌نده‌، ب دیالێكتێن خوه‌.
ھێژایان: ئیرۆ كوردستانا ئازاد بابه‌تێ زمانێ ستا‌نده‌رتێ كوردی گه‌له‌ك گه‌رمه‌، مخابن کو هنده‌ک که‌س خوه‌ ب ره‌وشه‌نبیر و نڤیسكار دزانن، دخوازن زاراڤێ سۆرانی ب كۆته‌كی، ب دارێ زۆرێ، د په‌روه‌ردا كوردستانێ ده‌ بسه‌پێنن و رێ ل به‌ر زاراڤێ كورمانژی ته‌نگ بكن و نه‌ھێلن، ئه‌ڤه‌ ژی دیتنه‌كه‌ به‌رته‌نگه‌ و كوژتنا زاراڤێ كورمانجی یه‌ و دژی جیھانا ئازادی و مافێ مرۆڤی یه‌...
ئه‌م ھێڤیدارم ب ره‌نگه‌كی ره‌حه‌ت و پر به‌رپرسیاری دان و ستا‌ندنێ ل سه‌ر ڤی بابه‌تی بكن، د ڤی كۆنفرانسی ده‌.
پاراستنا زاراڤێن كوردی و رێزگرتنا تایبه‌تمه‌ندیێن ھه‌ر زاراڤه‌كی و پێشچاڤوه‌رگرتنا ئێكگرتنا رێزێن ملله‌تێ كوردی و ب چاڤه‌كی ڤه‌كری ل دیالێكتێن كوردی بنێرن دوور ژ ره‌گه‌زپه‌ره‌ستیێ و ناڤچه‌گه‌ریێ و ھزرا نساخا به‌رته‌نگ و بلا دیتنا مه‌، دیتنه‌كه‌ نه‌ته‌وی بت.
دیتنا مه‌ ل ئێكه‌تیا نڤیسه‌رێن كورد -دوھۆك:
ھه‌ردوو زاراڤه‌یێن كورمانجی و سۆرانی مل ب مل ل دووڤ جوگرافیا ھه‌ر زاراڤه‌كی پێش ده‌ بچن و وه‌رارێ بكن، ل دبستانێن كوردستانێ، ئانكو جۆت - ستانده‌رد. زمانزان، پسپۆر، ئاكادیمی ب ھێمن ل سه‌ر بابه‌تێ زمانێ جۆت - ستانده‌رد، ڤه‌كۆلینێن خوه‌‌ بكن ژ بۆ پتر ده‌وله‌مه‌ندیا دیالێكتێن زمانێ كوردی ب گیانه‌كی ڤه‌كری. كه‌سی ماف نینه‌ ئیرۆ چ دیالێكتێن كوردی ژ ناڤ ببت، یان داخوازێ بكت.
باشتره‌ ب ره‌نگه‌كی زانستی ھزرا ب كارئانینا رێنڤیسا لاتینی بكن و جھه‌كی خوه‌ و ڤی كۆنفرانسی دا ببینت چونكه‌ كراسێ لاتینی پتر ل به‌ژنا زمانێ كوردی دھێت و د گه‌ل پێشڤه‌چوونا ته‌كنیكی ئالاڤێن گه‌ھاندنێ یا بله‌ز دگونجیت.
د گه‌ل رێزگرتنێن ئێكیتیا نڤیسه‌رێن كورد - دوھۆك.

سه‌رۆكێ ئێكیتیا نڤیسرێن كورد -دوھۆك
حه‌سه‌ن سلێڤانی

 

In focus articles